2009 布吉 + 曼谷遊記 Part 3

13/11/2009 (Fri)

好彩天公做美, 藍天白雲!
去餐廳食早餐, 佢d 早餐款式唔多, 另外有d set order求其order 左omelette, 同埋炒蛋+煙肉, 整多杯咖啡就起行
今日係出島的日子, 係泳池借埋毛巾, 行到酒店門口, 架車同2個鬼已經等緊, 耍個lum 就上車lu
好快就去到集合既地點, 等左好耐! 點解d人咁無守時觀念架, 搞到起碼遲左半個鐘先開船!!

上船啦, 一早就食定暈浪丸, 架船好快, 海面好大浪同埋好好風
諗起大家係香港拼搏我就係度吹海風嘆世界, 感覺零舍好架姐~
首先係Racha 沙灘度放低我地先, 要經過Racha 果條碼頭, 企唔穩好搞笑 :D
租左沙灘椅同太陽傘, 300B 3set, hea 左陣就上番船去第度浮潛

第1次玩, 點都要著life jacket, 開始都好唔慣用口呼吸, 但順左就好舒服, 係海入面感覺好平靜
下定決心, 下年夏天一定一定要學好游水! 咁就可以就咁租蛙鞋+帶mask 就潛落底啦!
落水無耐已經見到d 魚仔游埋黎, 好想掂下佢地, 不過佢地游得太快啦...
呢個spot 都唔算好多魚, 但係好大浪! 我好快已經頂唔緊, 拿拿臨叫19 拉我番船
上到船, 個人勁暈, 初時坐係度合埋眼抖下, 之後都要訓低, 有個crew 拎左件life jacket 比我枕下
訓左陣, 好番好多喇, 之後果個spot 佢話無咁大浪既, 所以我都有理無理即刻跳落水
我地今次先記得拎麵包餵魚, 呢邊多好多魚魚呀
我係咁係海入面好大聲同佢地講野, 係咁嗌: 魚魚!!!!! 比19 話我好嘈 :D 笑死我
但係不幸既事情發生了, GR...無電了........所以係呢個spot 係一張相都影唔到..........

開心既時間過得凸別快, 又係時候同魚魚講byebye...
上番船去番個島, 每次上船都有汽水/凍水飲, 仲有勁勁勁好味既西瓜! 夠凍又起哂沙, 狂食 :D
不過對於我呢d 0 運動既人黎講, 係咁易潛下已經累到媽都唔認得...

夠鐘去餐廳食飯lu, 仲以為係出去"不"架添, 原來係一碟碟菜咁上
救命, 好多烏蠅呀, 搞到我地3個都無哂胃口........
係咁易食d 炒飯填飽肚子, 行出去果陣見到好多大蜥蜴, 最多果陣我兩米範圍內有5條呀!!!!!!
佢地條利勁長, 係咁食烏蠅............不過行動緩慢, 都唔會話好驚既


食飽之後就行上view point 影下相, 係就係靚, 不過曬到爆!!!
然後就番我地張沙灘椅晒下太陽, 恰下, 得閒就落水玩下, d 沙好幼好舒服~

19小子出去游左好耐, 我地訓醒佢都仲未番黎!! 望極都望唔到佢, 幾驚佢有危險 :(
我直頭諗緊我要係邊度搵個西瓜掟出海呀..........啋啋啋
點知條友仔原來過左碼頭果邊游, 話好大浪好好玩wor! 枉我仲咁擔心你!


過左陣我地都出去玩浪, 真係好好玩wor原來! 對拖鞋成日比浪沖走...hahaha
越晏d 浪就越大, 雖然飲左好多海水, 但係真係好好好開心!!!
(春bb, 你係度的話, 我既開心起碼多三個好..................)

臨走仲有成樽麵包未餵哂, 拎黎餵下雀啦, 點知引到勁多雀過黎!!
有d 爭唔到既一路係度"抹"大口唔合番埋, 好funny :D
幾時都話係布吉有麵包就有朋友!

要走了, 走果陣好大浪, 係碼頭行果陣一步一驚心
一有浪到果陣就要停低, 唔係實會跌低! 個feel 好似玩緊狐狸先生幾多點 :D
好唔捨得Racha.........水清沙幼, 天呀, 點解香港d 沙灘咁X污漕!!!!!!!!!!!
吹住海風, 好快就番到Chalong Bay, 之前上船果陣有人幫我地影相, 依家就晒出黎賣, 100B 一張
見佢都影得我幾美麗, 好啦, 200B 三張成交!
好白痴, 我地臨上岸果陣係海洗左好耐, 想洗走哂d 沙, 但其實只會係越沖越多
點知番到佢間鋪佢放左好大盤水比我地洗 :D 白痴仔s!
飲埋杯泰國利賓納#xx#就離開了, 今朝個伯伯車番我地番酒店, 再見喇。

今天, 是我跟大海最接近的一天。

Tree 已經唔見左個鏡頭蓋, 番到酒店我發現GR 條頸繩都唔見左一邊, 嗚...........
唉, 都要沖涼換衫渣車去日落崖, 酒店門口有油站, 係咁易入左400B (2日淨係入左一次就夠哂!)
酒店距離日落崖都唔太遠, 又係唔駛20mins 就到lu!
當然2個龍友就係咁影影影, 我就無無聊聊遊離浪蕩
19今次叻仔有帶到閃燈, 我地係咁玩壓光 :D 好靚呀d相!好耐無咁樣睇過日落喇, 夕陽無限好, 只是近黃昏

太陽都落哂喇, 諗住走啦, 點知佢地好興奮咁話: magic magic! (講緊既係magical moment...)
我係隔離一邊餓, 一邊發吽逗........

係我地隔離係一班o架仔同o架妹, d o架妹一路影一路"樹該兒!!!"
其中一個o架仔都係用GR, 我見佢幫d o架妹用GR 影左幾張好靚的, 我就膽粗粗問佢可唔可以幫我整張
佢地好nice 當然話無問題啦! 我叫19 走開走開, d o架妹又學我講 "走開走開" :D
幫我影完, 果2個o架妹係咁話"卡娃兒哩" (我都知係禮貌黎既...)

真係走喇, 勁肚餓呀........成日都淨係食左份早餐+烏蠅餐............

黎布吉梗係要食番餐海鮮餐啦! 揀左Parlai Seafood, 係Phuket Zoo 個路口轉入去
都係好易搵, 但係入左路口之後好那黑, 去到Tang Kee 個路口有間士多, 問下人, 原來仲要再入
到lu, 泊好車就入去, 間野好大, 但係超過9成都係當地人黎, 拿拿臨出去揀海鮮先!

揀左2隻大瀨尿蝦做椒鹽, 2隻大虎蝦BBQ, 1隻肉蟹做紅咖喱, 白烚螺, 冬蔭功, 4隻生蠔, 同炒菜
又想食魚, 就出去揀多條魚炸左去 + sweet & sour sauce!
生蠔先上抬, 佢地話好正!!!! (我唔識食, 口感實在太嘔心)
瀨尿蝦正到唔識形容, 同HK食到的完全是兩碼子的事!!! 口感同鮮味完!!全!!!無得比呀!!!
大虎蝦d 肉好實, 好大舊, 諗起都仲覺得好飽...
咖喱蟹ok 啦, 隻味好似一隻薯片, 我都係鍾意建興既咖喱!
螺就好鮮甜! 條魚呢就勁正, 清哂 :D 同埋呢度既冬蔭功唔係紅色的, 不過都很好喝!~
呢餐豪食左 3280B, 圍番唔駛8舊水, 飽哂~~~

之後就渣車過Patong 喇, 今次車程比較遠d, 大概45mins
上Patong 條山路好過癮, 因為又斜, S彎又多又深, 好似上緊秋名咁 :D
而係左手面係電單車路, 地下既線都開始甩哂好難睇, 其實都幾危險, 不過我相信梁生手車!
但係由於指示不足 & GPS 失靈 (又!!!) 所以入錯左路口, 搞到tree 慶慶地話: 我真係唔想渣
唔好大我啦 :( 雖然我會同你鬥大 :(U 番出去, 再行番第個路口, 好快就見到 Oriental Massage 啦~!

入去之前要除鞋, 坐低飲杯茶填好form 比埋錢, 就開始lu!
佢話要分開, 咁我同tree 就係一間大房裏面 (有布簾同別人分隔)
19就一個人跟左個姐姐去......(頂佢出番黎話原來佢係一間獨立房!!!)
2hours 好快就過, dup得好爽! 夠哂正宗!
最鍾意都係最後比佢拉黎拉去, 鬆哂!~~

渣番出去Jungcelyon 果頭, 一落車就見到個鬼妹唔知做乜嗌哂police, 巴東真係幾雜...
係Jungcelyon 影左幾張相當到此一遊, 見到Swesens 收1點, 就入去整番杯雪糕嘆下
食完都12點幾, 又無乜野做, 返歸lu, 隔離果條街好多人好多bar, 仲有pool party, 好熱鬧!
轉錯路口, 巴東d 路係one way, 又要兜一大輪先出得番去, 開始認得d 路, 回家無難度 :D

番到酒店拎埋張相比19, 發現原來條頸繩既另一邊係個膠袋入面, yeah! Lucky me! 唔駛訓sofa lu!
然後條友仔走過黎浸bubble bath, 仲影埋d 出浴照添...不過唔敢post :( 怕無fd子做 :(
訓lu, 早抖 :)